Fununu:Cristiano Ronaldo, Madrid Hispania

 

MADRID, HISPANIA

KILA sehemu kuna wazee wenye busara, hata kama sio wazee kiumri. Mchambuzi maarufu wa soka la Hispania anaamini kuwa huu ndiyo utakuwa msimu wa mwisho kwa Cristiano Ronaldo kukipiga Santiago Bernabeu.

Guillem Balague, mchambuzi maarufu wa soka la Hispania anaamini kuwa huu ni msimu wa mwisho kwa Ronaldo Santiago Bernabeu na ingawa mwenyewe mapema wiki hii alidai kwamba anataka kucheza Real Madrid mpaka mwisho wa maisha yake ya soka, lakini Balague anaamini kuwa Ronaldo anaenda Ufaransa kuichezea PSG.

Balague anaamini kuwa wawakilishi wa Real Madrid na wawakilishi wa Ronaldo wote wana furaha kuona staa huyo inabidi asonge mbele na maisha mapya baada ya kufanya mambo mengi makubwa akiwa Santiago Bernabeu.

“Anaweza kucheza mpaka akifikisha miaka 40, lakini kuna mkakati maalumu kutoka kwa watu wake. Inaonekana huu utakuwa msimu wa mwisho kwa Cristiano Ronaldo Real Madrid. Inaonekana pia kuwa Madrid siyo kwamba hawana furaha na suala hilo,” alisema Balague.

Juzi Ronaldo alifunga bao moja katika ushindi wa mabao 3-0 wa Real Madrid dhidi ya Levante katika Ligi Kuu ya Hispania La Liga na kwa kufanya hivyo aliweka rekodi ya kuwa mfungaji bora wa muda wote katika historia ya Real Madrid.

Hilo lilikuwa bao la 324 katika mechi  310 alizoichezea Real Madrid akivunja rekodi ya mkongwe wa timu hiyo, Raul Gonzalez aliyefunga mabao 323 katika mechi 741 alizoichezea miamba hiyo ya Santiago Bernabeu. Msimu uliopita, Ronaldo ambaye ni hasimu mkuu wa staa wa Barcelona na timu ya taifa ya Argentina, Lionel Messi aliifungia Real Madrid mabao 48 katika mechi 35  na kutwaa kiatu cha ufungaji bora wa mabao barani Ulaya.

Balague anaamini kuwa staa huyo wa kimataifa wa Ureno ambaye Februari 5 mwakani atatimiza miaka 31 ataelekea nchini Ufaransa katika hatua nyingine muhimu ya maisha yake ya soka.

“Inaonekana ni kitu cha kushangaza sana unapoangalia rekodi ambazo amezipata, ikiwemo kuwa mmoja kati ya wafungaji bora zaidi duniani. Lakini labda Real Madrid inaamini kuwa ameshafika kileleni na nina hisia kwamba PSG ndiyo itakuwa chaguo lake kubwa. Naamini ni katika kipindi kijacho cha majira ya joto. Sidhani kama atakuwa Real Madrid kwa muda mrefu,” aliongeza Balague.

Ronaldo alinunuliwa na Real Madrid kwa dau la Pauni 80 milioni kutoka Manchester United Juni 26, 2009 huku akivunja rekodi ya uhamisho na kuwa mchezaji ghali zaidi katika historia ya soka duniani huku akisaini mkataba wa miaka sita.

Mkataba wake kwa jumla ulikuwa na thamani ya Euro 11 milioni kwa mwaka na kulikuwa na kipengele ambacho kingemruhusu kuondoka klabuni hapo kama kuna timu ingefikia dau la Euro 1 bilioni.  Alikabidhiwa jezi namba 9 na mkongwe wa Real Madrid, Alfredo Di Stefano huku akitambulishwa Santiago Bernabeu mbele ya mashabiki 85,000 na kuvunja rekodi iliyowekwa na staa wa zamani wa Argentina, Diego Maradona ambaye alitambulishwa mbele ya mashabiki 75,000 wakati alipohamia Napoli kutokea Barcelona mwaka 1984.

Share on Google Plus

About Unknown